योगेन्द्रमिलन छन्त्याल
९ माघ, लिस्बोन । लोक तथा दोहोरी गायिका मुना थापाले पोर्तुगलमा रहेका नेपालीहरुलाई बेस्सरी नचाइन् । मुनासँग स्थानीय युवाहरुले पालैपालो दोहोरी पनि गाए ।
सम्भवत पोर्तुगलमा सम्पन्न एनआरएन निर्वाचनबाहेक सबैभन्दा धेरै नेपालीहरुको सहभागिता रहेको सांगीतिक साँझमा मुनाले आफ्ना दर्जनौ लोकप्रिय गीतहरु सुनाइन् । मुनाका चिसो हावा सरर, रुमाल फरर, मुखै तीतो गरायो तीते करेलीले, मलाई लठ्ठै गरायो झिमझिम परेलीले गीतलगायत दोहोरीहरु असाध्यै मन पराएर कार्यक्रमका दर्जनौ दर्शकहरुले २० देखि १०० युरोसम्म नगद उपहारसमेत दिए । नगददाताहरु कसैले स्वर मन परेर त कोहीले सांगीतिक यात्राको निरन्तरताको कामनास्वरूप सहयोग गर्न चाहेको बताउने गरेका थिए ।
गायिकालाई तालीको गडगडाहटले पनि युरोजत्तिकै जोश जाँगर थपिएको पाइन्थ्यो । दर्शकहरुको वाहवाही, तालीसहित नाच्दै साथ पाउँदा गोर्खाली ठिटी मुनाले उनको सुरिलो स्वरलाई अझ तिखारिन् । सायद उनको गीतमा नाचेर थुप्रैको ज्यान दुख्यो होला कार्यक्रमबाट बाहिर आउँदा ।
जिउडाल पनि चटक्क परेकी सुन्दरी गायिका मुना पनि नेपाल फर्कन मन छैन त भनिन दोहोर्याइ तेहर्याइ । ईश्वरी कंडेल र प्रकाश सुवेदीले दोहोरीमा यसरी फकाए कि मानौ, मुनाले हुन्छ नि त भनेकी भए पोर्तुगलमै राख्थे । अप्ठेरो पर्न लाग्नेबित्तिकै अर्को खोचे थापी हाल्छन् । दर्शकहरुले पनि थाहा पाए कि यो दोहोरीको रणनीति अचम्मैको हुँदो रहेछ ।
कार्यक्रममा बेल्जियमबाट आएका र स्थानीय कलाकारहरुले मनोरन्जनात्मक नृत्यहरु प्रस्तुत गरेका थिए । केही गीतहरु पनि गाइएका थिए । आयोजकले नाच्ने गाउने कलाकारहरुलगायत नृत्य प्रशिक्षण गराउने संजय लामालाई प्रमाण पत्रसहित आभार प्रकट गरेको छ ।
माघे संक्रान्तिको अवसरमा नेपाल मगर समाज, पोर्तुगलले आयोजना गरेको सांस्कृतिक साँझमा नेपालबाट आएका प्रमुख अतिथि पोखरा विश्वविद्यालयका निवर्तमान उपकुलपति, त्रिभुवन विश्वविद्यालय प्राध्यापक एवं मगर जाति संस्कृतिविद डा. केशरजंग बरालले माघे संक्रान्तिबारे स्पष्ट पारेका थिए । बरालले मगर जातिको भाषिक, सांस्कृतिक र जातीय उत्थान र विकासका लागि शिक्षा र सकारात्मक विभेदलाई जोड दिनुपर्ने बताए ।
अर्का अतिथि मगर विद्यार्थी संघका अध्यक्ष एवं आदिवासी जनजाती विद्यार्थी संघका वरिष्ठ उपाध्यक्ष माधव दर्लामी मगरले पिछडिकाहरुलाई प्राकृतिक न्यायको सिद्धान्तबमोजिम पनि अधिकारका लागि आवाज उठाउन पाउनुपर्नेमा जोड दिए ।
गैह्र आवासीय नेपाली संघ अन्तर्राष्ट्रिय समन्वय परिषद्का सदस्य पूर्ण हमाल र विश्व मगर संघ बेल्जियमका कार्यबाहक सचिव कुलबहादुर रजानले पनि प्रवासमा यस्ता कार्यक्रमले नेपालीहरुबीच सुमधुर सम्बन्ध स्थापनाका लागि सहयोग पुग्ने विचारसहित शुभकामना मन्तव्य राखेका थिए ।
कार्यक्रम समाजका अध्यक्ष रामप्रसाद पुनको अध्यक्षतामा कार्यक्रमको संचालन सचिव मिनप्रसाद पुन र खेमप्रसाद जुग्जलीले गरेका थिए । कार्यक्रम ग्रासाको नुनो गुन्काल्भेस स्कूलमा सम्पन्न भएको थियो ।
